اصابة اسفل الظهر

انا شاب عمري 22 سنة , نلعب عديد الرياضات من صغري حتى رياضة رفع الاثقال , اما عندي اشهر ملي انقطعت , و في الازمة متع الكورونا حبيت نعمل شوية تمرينات , و من سوء حضي قبل منعمل اي احماء كيما العادة هزيت حاجة رزينة شوية قدامي باش نبعدها و وقتها حسيت بحاجة في ظهري كيف الصعقة متاع الكهرباء لحقيقة شكيت وقتها انو نجم نكون ضربت ظهري , اما ماكناتش فما حاجة كبيرة او وجع مستمر , كملت تمريناتي عادي , اما مبعد سوايع بديت نحس اوجاع في الحوض معا كل تحريكة , الاوجاع تشبه للصعقة متاع الكهرباء في كل تحريكة .
تنحاو في اليوم الموالي اما بدات الحرقة في الجانب اليمنى في الحوض و بدى يطور بالايام بحكم نقعد بالسوايع على الكرسي , معادش لاقي راحتي جملة في القعدة على الكرسي قدام الحاسوب , والحالة تعكرت اكثر كي وليت نمشي برشا , ولات ساقي اليمين الكل و خاصة منطقة الفخذ تحرق , و معادش حامل القعدة على الكرسي و المشي .
اتصلت بطبيبة عظام و مفاصل قالت انو الحالة انزلاق ديسك ضاغط على عرق الاسى , وقالتلي انو منجم ناخو كان مسكنات كهو بحكم انو مضادات الالتهابات غير منصوح بيها بسبب انتشار مرض الكورونا, والراحة و عدم المشي الكثير و عدم الجلوس على الكرسي .
و لي زاد اكدلي انو كلام الدكتورة صحيح انو كي نعمل تمرينات المنصوح بيها في للانزلاق الديسك و عرق الاسى , نحس بأرتياح مباشر على مستوى الساق و حرقة خفيفة تظهر على مستوى اسفل العامود الفقري كيما يقولو التمرينات بضبط.
توى عندي ايامات على هل الحال نهار كامل على الفرش منتحركش برشا ومنقعدش على الكرسي . و لحقيقة مفماش تطور كبير في حالتى توة يعني منيش نحس انو فما تقدم ايجابي كبير , نقص شوية الالم و الحرقة في الساق.
سوالي هو هل الحالة متاعي تطلب نشوف طبيب في اقرب وقت ؟ و هل تاخير العلاج يأثر على عملية الشفاء من الاصابة مستفبلا ؟ و نكمل في التمرينات المخصصة للانزلاق الغضروفي ؟ و هل يمكنني العودة الى حياتي الطبيعية بعد مدة اذا كانت اصابة عادية ام تأثر على نشاطاتي مدى الحياة ؟
اسف كان طولت , لأنو ملقيتش حتى سبيل باش نعرف شنوة اللي صارلي و الا شنوة باش يصيرلي في ضل الازمة الحالية للكورونا و المشكل انو اغلب المقالات على الانترنت على انزلاق الديسك لا تبشر بخير.
و شكرا جزيلا